ഭയം

ഭയമാണ് മഴയെ, കിനാവിനെ, കാറ്റിലെന്‍- 

പടി കടന്നെതും സുഗന്ധ സ്വപ്നങ്ങളെ.

ഭയമാണ് മയിലിനെ,മഴവില്‍ നിറങ്ങളെ,

പുഴകളില്‍ പെയ്യുന്ന കുളിരുന്ന മഞ്ഞിനെ.

ഭയമാണ് പകലിനെ, പാതിരാക്കാറ്റിനെ,

പല മുഖംമൂടിയില്‍ പരിചയം ഭാവിച്ചു 

വിരലില്‍ തോടുന്നോരീ ജീവിതാസക്തിയെ...

ഭയമെനിക്കെന്നെ,

എന്‍ നിഴല്‍ വീണ മണ്ണിനെ...

മറവിയില്‍ വറ്റാത്ത നിന്റെ കണ്ണീരിനെ..

മരണവീടാകുന്നു മാനസം,

പൊള്ളുന്ന 

മഴയേറ്റ്‌ വെന്തു പോയ്‌ തൊടികളും തോഴരും.

ഉടയുന്ന കണ്ണടയി-

ലോടുവിലെ കാഴ്ചയായ് 

പ്രളയം വരട്ടെയെന്‍ പ്രണയതീരങ്ങളില്‍ .

ബി മധു