അന്തര്‍മുഖത്വം

മേഘപ്പുരകള്‍ ചോര്‍ന്നൊലിക്കാന്‍ തുടങ്ങിയിട്ട് രണ്ടുനാളായി

പുരപ്പുറത്തു തകൃതിയായ ചെണ്ടമേളം

താളം മുറുകിയും അയഞ്ഞും

മിന്നലിന്റെ അലങ്കാരപ്പണികള്‍

മദ്ധ്യേ കാതടപ്പിക്കുന്ന കതിനകള്‍

വാരിക്കോണുകളില്‍ കുംഭീതുണ്ഡങ്ങള്‍

തിടമ്പെടുത്ത കദളീപത്രങ്ങള്‍

തെങ്ങോലവെഞ്ചാമരങ്ങള്‍

മേല്‍പ്പുരത്തുമ്പില്‍ നീര്‍ത്തോരണങ്ങള്‍

മഴവില്ലിന്‍റെ കുടമാറ്റവിസ്മയം

നുരപ്പോളകളുടെ ജനസഞ്ചയം

പുറത്ത് മഴപ്പൂരം പൊടിപൊടിക്കുന്നു.


പക്ഷെ പൂരദൃശ്യങ്ങള്‍ വെടിഞ്ഞു

കരിമ്പടത്തിനുള്ളിലെ ഇരുട്ടില്‍ തപ്പി

ഇല്ലാസ്വപ്നങ്ങള്‍ക്ക് ഇലയിട്ടു

എന്നിലേക്ക്‌ എന്നെ നേദിച്ച്

ഉറക്കം കാത്തിരിക്കാനാണ് എനിക്കിഷ്ടം